الثلاثاء، 6 أفريل 2010

هل نحن جاهزون للحريّة؟

صحيح قلت بش نعتزل وقتيّا التدوين
لكن الله غالب ما نجمتش نشدّ روحي بعد قراءة السؤال
هل نحن جاهزون للحريّة؟
حول مضوع المبيد الحشري الفايسبوكي ومشتقّاته
في مدوّنة بين الوديان بالرغم أنني مانستعملش الفيس بوك بسبب الإلتزامات .

إنتي عبارة جاي لطفل صغير قتلو ما نشريلك كورة كان ما تتعلّم تكوّر
كيفاش بش يتعلّم يكوّر وهو ما عندوش كورة
وبرى شريتلو كورة،
ماتتوقّعش منوا بش أوّل نهار يبدى يدريبل ويماركي في البونطوات
وسي نورمال برشا بش يطيح ويتجرح مادامو يكوّر على الكياّس متاع الحومة

المدرسة الوطنيّة لعلوم الإعلاميّة تخرّج في أفضل مهندسي الإعلاميّة في العالم،
براس لعزوزة سطّرلي سطرين على كلمة في العالم
تراه هزّ راسك ، قولها ، إي ولاد بلادك شبيك حاشم
أفضل مهندسي الإعلامة في العالم

لا يا سي الزبراط لقورّة ماهمش زايدين علينا عـ...
ويزّيونا باللهي من عقدة النقص
الفرق الوحيد مابيناتنا وهوما ، ) باعتبار أنني مشارك في عديد الفورومات العالميّة(
هو أنّو هوما مستانسين بالإختلاف
الإختلاف عندهم حاجة عاديّة برشة
بل يضربهم الشكّ والريبة من الإجماع التام
أما أحنا الإختلاف عنا حاجة شاذة )لأسباب يعلمها القاصي والداني( والواحد يبدى خايف لا يمشي عكس التيّار
بالنسبة لها العنف الشديد الي ضهر في الفايس بوك ، أنا مستبشر بيه
وبالعكس نشجّع عليه
تعرفش علاش
شبيك مزروب
تحب تعرف كلشي
وفيسع
وبلاش
وبلاش هاذية ما هضمتهاش
كل شي بالفلوس، حتى الهواء بالفلوس،
كان أنا قعدت نحكي بلاش.
أيّا عاد نجيو لحكاية العنف الفيسبوكي من سبّان وتفسيخ بروفيلات.
الحريّة كيما الهريسة أوّل ما تكلها ، تحرحرك، تهبّطلك دموعك ومبعّد كي تستانس بيها ما يحلى الكسكروت كان بيها

لو نأخذ طرفين موش مستانيسين بالإختلاف ذوي توجّهات مختلة
تو نلقاوهم يتبّعوا نمط معيّن في تصرّفاتهم
بش نزيد نفسّر بش نعطيكم نموذج مصغّر لما قد يصير على مستوى أكبر
بش ناخذوا تجربة دخول مدوّن قزوردي للبلوقسفار
كانت اللحضة الأولى
لحضة اكتشاف الآخر المغاير
لحضة الصدمة والذهول كانت من الطرفين، منّو هوا ومن بقية المدوّنين
ثمّ المرحلة الثانية وهي لحضة العنف المتبادل ومحاولة قمع الإختلاف كانت من الطرفين
وكنت فسّرت في تدوينة سابقة أسباب وآليّات العنف هذا
ومن ثمّا تعدّينا لمرحلة ثالثة
ولحضة اللامبالات بالإختالاف أو بالأحرى قبول الإختلاف والتعوّد على وجود الآخر المخالف
والإقتناع بأنّ الآخر يثريني ولا ينفيني
ووقتها كانت تنجّم تتكوّن أرضية حوار جدّي لولا أنّو السيّد دورها قوادة ونصبان منادف

أنا مستبشر لأننا في الفايس بوك فتنا اللحضة الأولى لحضة الصدمة
ودخلنا في لحضة العنف المتبادل
ومادام الأضرار بسيطة ، سبان وتسكير بروفيلات،
ميسالش خلي تلحم تاكل بعضها مش حرام في الحرّية

وعن قريب ندخلو في مرحلة قبول الإختلاف
ولذالك مرحلة العنف مرحلة ضرورية ما نجموش نقزوها
وحسب معرفتي المتواضعة جدا بالتاريخ
عمروا ما صار قبول للآخر المخالف دون المرور بمرحلة العنف

يقول عاشق الكحول :
هل نحن جاهزون للهريسة؟
يجيبه عاشق السجائر:
- عن قريب صنصبح جاهزين
وستكون أهمّية الهريسة لا تقلّ عن أهمّية الخبزة
ليكتمل الكسكروت

هناك 6 تعليقات:

  1. les meilleurs informaticiens du monde ça j'en doute fort....mais pour le reste je suis d'accord sur cette théorie que la démocratie ça s'apprend mais il faut aussi installer les institutions nécessaires pour pouvoir aller de l'avant.

    ردحذف
  2. باهية برشا فازة الهريسة هذا هو الصحيح برشا ناس غافلين يلزمهم الهريسة باش يفيقو على رواحهم
    وانا نسمية traitement de choc


    صفحة المبيد الحشري الفايسبوكي حركت المياه الراكدة وأعلنت إفلاس ما يسمى مجازا النخب المثقفة

    ردحذف
  3. Bon l'ENSI t5arrej fi a7sen ingenieurète fel 3alem mouch s7i7e
    bien ke ana weld l'ENSI
    mais ça n'empeche ,houni fi fransa , l'ENSI bdat tet3raf, grace à la quealité de ses ingénieurs

    bennesba l'ezzabrate femma 7ajète 9alhom s7a7e wfemma 7wayej , ihez wyosbot barcha

    wyasser vayass, za3ma houwa meno5ba el meththa9fa elli yoghzrou lel 3bad mel fou9

    ennass lkol kifkif wma femma 7ad 5ir men 7ad, kan baf3alou

    ردحذف
  4. سي سواقر ، عجبني تحليلك و متفق معاه

    ردحذف
  5. و يلزمنا نزربو و ندخلو في بيعة الحرية على خاطر جايينها جايينها و نطولو فيه على رواحنا و بأزيد تكسير خلايق

    ردحذف
  6. @ anonyme et cauchy
    ولاهي مصدر المعلومة هو مدير الأنسي بشخصه
    لكن والحقّ يقال مقالش لكلّهم طيّارت وإنّما قال تخرّجت منها ثلّة من أفضل المهندسين في العالم

    @ touns66 et 3onsor
    مالا شمّروا على يديكم
    هدّ على الفايسبوك كي الجراد
    لا ترحمو لا أخضر لا يابس
    ما تخلّيو حتى نقاش من غير متقولو رايكم
    خلّي نزربوا في التراتمون

    ردحذف